ლია კოტორაშვილი

მე, ლია კოტორაშვილი, 1983 წლიდან დღემდე ვმუშაობ სტუ კვების მრეწველობის სამეცნიერო-კვლევითი ინსტიტუტში. ამჟამად ვარ სასურსათო პროდუქტების ხარისხისა და უვნებლობის კვლევის განყოფილების უფროსი მეცნიერ თანამშრომელი. 1982 წელს წარჩინებით დავამთავრე საქართველოს ტექნიკური უნივერსიტეტის ქიმიური ნივთიერებების ტექნოლოგიის ფაკულტეტი და მომენიჭა ინჟინერ-ქიმიკოს-ტექნოლოგის კვალიფიკაცია. 2009 წელს დავიცავი დისერტაცია თემაზე: „რეჰანის ნედლეულიდან ალკოჰოლიანი და უალკოჰოლო სასმელების ნატურალური არომატიზატორების მიღების რაციონალური ტექნოლოგიის დამუშავება“, მომენიჭა კვების პროდუქტების ტექნოლოგიების დოქტორის აკადემიური ხარისხი. გავლილი მაქვს კვალიფიკაციის კურსები - სტანდარტიზაციისა და მეტროლოგიის სასწავლო-სამეცნიერო ინსტიტუტში, სპეციალობა: პროდუქციის სერტიფიკაცია, სერტიფიკაციის ორგანო და საგამოცდო ლაბორატორიის აკრედიტაცია (წარჩინებით). ჩემი სამეცნიერო ინტერესების სფეროს წარმოადგენს საკვები პროდუქტების უსაფრთხოებისა და უვნებლობის პროცესების შესწავლა, ნორმების დადგენა; პროდუქციის ფალსიფიკაციის დადგენის მეთოდების შერჩევა; ნატურალური საკვები დანამატების: საღებავების, არომატიზატორების, შემასქელებლების და სხვ. წარმოების რაციონალური ტექნოლოგიების დამუშავება და მათი გამოყენების სფეროების განსაზღვრა; ინოვაციური ტექნოლოგიების შექმნისა და კომერცალიზაციის ძირითადი მიმართულებები საქართველოს კვების მრეწველობაში და ა. შ. ჩემს მიერ შესრულებული სამუშაოებიდან აღსანიშნავია შემდეგი: • ნატურალური საკვები არომატიზატორების წარმოების მეცნიერული საფუძვლების გამოკვლევა; • ეთეროვანი ზეთების წყლის ორთქლით გამოხდის პროცესის მეცნიერული საფუძვლების დამუშავება; • ქართული ტიპის ღვინოების მეცნიერული საფუძვლების გამოკვლევა; • ყურძნის ნატურალური საღებავების მიღების რაცინალური ტექნოლოგიის დამუშავება; • დაფნისა და ევკალიპტის ნედლეულიდან ბიოაქტიური ექსტრაქტების მიღების ტექნოლოგიების დამუშავება; • პურის ნატურალური გამაუმჯობესებლების ტექნოლოგიის გამოკვლევა; • ეკოლოგიურად სუფთა საკვები დანამატების: საღებავების, არომატიზატორების, შემასქელებლების წარმოების რაციონალური ტექნოლოგიების დამუშავება; • ეთერზეთოვანი ლავანდის მოვლა–მოყვანისა და გადამუშავების ტექნოლოგიების დამუშავება და დანერგვა (მსოფლიო ბანკის გრანტი); • თხევადი შაქრის წარმოების ტექნოლოგიის დამუშავება (სტუ გრანტი); • პურის ნატურალური დანამატის მიღების ტექნოლოგიის დამუშავება (სტუ გრანტი); • თაფლის ღვინის დამზადების რაცინალური ტექნოლოგიის დამუშავება; • პესტიციდებისა და შხამ–ქიმიკატების გავლენა ყურძნისა და მისი გადამუშავებული პროდუქციის ხარისხსა და უსაფრთხოებაზე. სამეცნიერო მოღვაწეობის პერიოდში გამოქვეყნებული მაქვს 91 სამეცნიერო ნაშრომი, მათ შორის 1 მონოგრაფია, 1 სახელმძღვანელო. სამეცნიერო-კვლევით მუშაობასთან ერთად ვეწევი შეთავსებით საქმიანობასაც. პედაგოგიურ მოღვაწებას ვეწევი საქართველოს ტექნიკურ უნივერსიტეტში და თბილისის ივ. ჯავახიშვილის სახელობის სახელმწიფო უნივერსიტეტში - ზუსტი და საბუნებისმეტყველო მეცნიერებათა ფაკულტეტზე. მიღებული მაქვს ვერცხლის მედალი მოსკოვში გამართულ სსრკ სახალხო მეურნეობის მიღწევათა გამოფენაზე, 1988 წ. 2019 წლიდან არჩეული ვარ საქართველოს საინჟინრო აკადემიის წევრ–კორესპონდენტად.